Mwandishi:
Mhariri:
Imeboreshwa:
ULY CLINIC
Dkt. Benjamin L, MD
20 Agosti 2026, 05:09:52
Maumivu ya uume wakati wa kujamiana
Dispareunia (hutamkwa dis-pa-ROO-ni-a) ni neno la kitabibu linalomaanisha maumivu yanayotokea wakati wa tendo la kujamiiana. Ingawa neno hili linaweza kutumika kwa mwanamke au mwanaume, makala hii inalenga maumivu yanayotokea kwenye uume wa mwanaume wakati wa kujamiiana, wakati wa kusimama kwa uume au baada ya kufika kileleni.
Maumivu yanaweza kuwa kwenye ngozi ya uume, kichwa cha uume, govi, ndani ya mrija wa mkojo au sehemu ya chini ya uume, na yanaweza kujitokeza wakati wa kuingiza uume, wakati wa msuguano, wakati wa kumwaga shahawa au baada ya tendo. Wakati mwingine huambatana na dalili kama kuwashwa, kuungua, vidonda, uvimbe, kutokwa na majimaji au mabadiliko ya umbo la uume.
Sababu zake ni nyingi na hutofautiana kutoka matatizo rahisi kama msuguano na ukavu hadi maambukizi, magonjwa ya zinaa, matatizo ya govi, jeraha, ugonjwa wa Peyronie au priapizimu. Kwa hiyo, maumivu ya uume wakati wa tendo si jambo la kupuuzwa ikiwa yanajirudia au yanaambatana na dalili nyingine. Makala hii inaeleza visababishi, dalili zinazoweza kuambatana, uchunguzi na namna ya kutibu kulingana na chanzo.
Dalili zinazoweza kuambatana
Maumivu wakati wa kuingiza uume
Kuchomeka au kuungua ndani ya uume
Kuvimba au uwepo wa malengelenge
Kutokwa na majimaji kwenye kichwa cha uume
Kubadilika kwa umbo la uume, mfano kujikunja
Maumivu baada ya tendo au wakati uume ukisimama bila msisimko
Visababishi vya maumivu ya uume wakati wa kujamiiana
1. Magonjwa ya zinaa
Kisonono, klamidia, herpes na trikomoniasi ni miongoni mwa maambukizi yanayoweza kuhusishwa na maumivu ya uume. Maambukizi haya yanaweza kuathiri ngozi, kichwa cha uume au mrija wa mkojo.
Mwanaume anaweza kupata kuungua wakati wa kukojoa, kutokwa na majimaji, vidonda au malengelenge, kuwashwa na maumivu wakati wa kujamiiana. Baadhi ya maambukizi yanaweza pia kuwepo bila dalili zinazoonekana.
2. Magonjwa ya ngozi ya uume
Baadhi ya magonjwa ya ngozi kama balanaitisi, likeni planasi, psoriasis na magonjwa mengine ya ngozi yanaweza kuathiri uume. Hali hizi zinaweza kusababisha wekundu, kuwasha, ngozi kupasuka, vipele au maumivu.
Msuguano wakati wa tendo unaweza kuongeza muwasho na maumivu ikiwa ngozi tayari imekuwa na uchochezi au jeraha.
3. Mabadiliko ya muundo wa uume
Ugonjwa wa Peyronie unaweza kusababisha kovu ndani ya tishu za uume na kufanya uume kujikunja wakati wa kusimama. Baadhi ya wanaume hupata maumivu wakati wa kusimama au wakati wa kujamiiana, na mabadiliko ya umbo yanaweza kufanya tendo kuwa gumu au lenye maumivu.
Jeraha kwenye uume linaweza pia kusababisha maumivu na mabadiliko ya muundo, hasa ikiwa kuna kovu lililobaki baada ya jeraha.
4. Matatizo ya govi
Kwa mwanaume ambaye hajatahiriwa, govi linalobana sana, hali inayojulikana kama fimosisi, linaweza kufanya govi lishindwe kusogezwa vizuri. Msuguano wakati wa tendo unaweza kusababisha maumivu, michubuko au kupasuka kwa ngozi.
Maambukizi au uchochezi wa govi na kichwa cha uume pia unaweza kuongeza maumivu. Tiba hutegemea chanzo na inaweza kuhusisha dawa maalumu au, kwa baadhi ya watu, kutahiriwa.
5. Mzio au muwasho wa ngozi
Kondomu, vilainishi, sabuni, manukato au bidhaa nyingine zinazogusa uume zinaweza kusababisha muwasho au mzio kwa baadhi ya wanaume. Dalili zinaweza kujumuisha wekundu, kuwasha, kuungua au maumivu.
Ikiwa dalili huanza kila mara baada ya kutumia bidhaa fulani, ni muhimu kumweleza mhudumu wa afya kuhusu bidhaa hiyo. Kubadilisha aina ya kondomu au kuacha bidhaa inayosababisha muwasho kunaweza kusaidia, lakini ni muhimu kuhakikisha kuwa dalili hazisababishwi na maambukizi.
6. Priapizimu
Priapizimu ni kusimama kwa uume kwa muda mrefu bila kuhusishwa na msisimko wa kawaida wa kingono. Hali hii inaweza kuwa na maumivu makali na ni dharura ya kitabibu, hasa ikiwa kusimama kwa uume kunaendelea kwa saa nne au zaidi.
Kuchelewesha matibabu kunaweza kusababisha uharibifu wa tishu zinazosaidia uume kusimama na baadaye kuleta tatizo la kudumu la kusimama kwa uume. Mwanaume mwenye uume uliosimama kwa muda mrefu na wenye maumivu anapaswa kutafuta huduma ya dharura.
7. Mawe kwenye njia ya mkojo
Mawe kwenye figo au njia ya mkojo yanaweza kusababisha maumivu yanayosafiri kutoka mgongoni au ubavuni kuelekea tumboni, kinena na wakati mwingine uume. Maumivu yanaweza kuongezeka au kuonekana katika mazingira mbalimbali, ingawa si kila maumivu ya uume yanayotokana na mawe.
Dalili zinazoambatana zinaweza kuwa damu kwenye mkojo, maumivu wakati wa kukojoa, haja ya kukojoa mara kwa mara au maumivu makali yanayokuja kwa vipindi.
8. Maumivu wakati au baada ya kumwaga shahawa
Baadhi ya wanaume hupata maumivu wakati au baada ya kumwaga shahawa. Maumivu yanaweza kuwa kwenye uume, sehemu ya chini ya tumbo, nyonga, korodani au eneo kati ya korodani na njia ya haja kubwa.
Sababu zinaweza kuhusisha maambukizi au uchochezi wa njia ya mkojo, tezi dume au matatizo ya misuli ya sakafu ya nyonga. Ikiwa hali hii inajirudia, uchunguzi wa kitabibu unaweza kusaidia kubaini chanzo.
Uchunguzi wa kitabibu
Daktari anaweza kuanza kwa kuuliza kuhusu wakati maumivu yanapotokea, sehemu yanapohisiwa, uhusiano wake na kusimama kwa uume au kumwaga shahawa, pamoja na historia ya maambukizi, jeraha na matumizi ya dawa.
Daktari anaweza kufanya:
Uchunguzi wa mwili wa uume na korodani
Vipimo vya maambukizi ya zinaa: kama vile VDRL, PCR ya herpes, kipimo cha ute unaotoka uumeni
Kipimo cha mkojo: kubaini uwepo wa maambukizi au damu kwenye mkojo
Ultrasound ya uume au kibofu (kama kuna shaka ya mawe au peyronie)
Kipimo cha mzio (ikiwa inahisiwa mzio)
Tiba na ushauri
Tiba hutegemea chanzo. Maambukizi ya bakteria hutibiwa kwa dawa zinazofaa kulingana na maambukizi yaliyothibitishwa au yanayoshukiwa kitabibu, wakati maambukizi ya virusi kama herpes yanaweza kuhitaji dawa za kupunguza shughuli za virusi.
Matatizo ya govi yanaweza kuhitaji dawa maalumu, mazoezi ya kulilegeza govi chini ya ushauri wa mtaalamu au kutahiriwa katika baadhi ya mazingira. Ugonjwa wa Peyronie unaweza kuhitaji ufuatiliaji, dawa au matibabu mengine kulingana na ukali wa tatizo.
Ikiwa maumivu yanatokana na muwasho au mzio, chanzo kinapaswa kuondolewa. Usitumie krimu, dawa za asili au antibiotiki bila kujua chanzo, kwa sababu baadhi ya dawa zinaweza kuongeza muwasho au kuficha dalili muhimu.
Jedwali la muhtasari wa tiba na ushauri
Chanzo | Tiba |
Magonjwa ya zinaa | Dawa za kuua vimelea ikitegemea kisababishi (antibayotiki au dawa za kupambana na virusi) |
Govi kubana | Dawa za kutuliza uvimbe au upasuaji mdogo (kutahiriwa) |
Ugonjwa wa Peyronie’s | Dawa za kupunguza kovu au upasuaji |
Mzio wa kondomu au dawa | Epuka kichocheo husika, tumia kondomu zisizo na latex |
Ngozi nyeti au kuungua | Tiba ya krimu za kupunguza muwasho na kinga |
Kusimama kwa muda mrefu (priapizimu) | Dawa za kukatisha msisimko, au kutoa damu kwenye uume kwa sindano |
Wakati gani umwone Daktari?
Muone daktari ikiwa:
Maumivu yanajirudia au yanaendelea
Kuna vidonda, malengelenge, uvimbe au mabadiliko ya ngozi
Kuna majimaji yasiyo ya kawaida yanayotoka kwenye uume
Kuna damu kwenye mkojo au shahawa
Kuna maumivu wakati wa kukojoa
Uume umeanza kujikunja au kubadilika umbo
Maumivu yanaambatana na homa au kutetemeka
Kuna maumivu ya korodani au nyonga
Kuna historia ya uwezekano wa kuambukizwa ugonjwa wa zinaa
Tafuta huduma ya dharura ikiwa uume umesimama kwa maumivu na hali hiyo imeendelea kwa saa nne au zaidi, au ikiwa kuna jeraha kubwa la uume, maumivu makali ya ghafla au uvimbe mkubwa.
Kumbuka
Usitumie dawa za asili au za kienyeji kabla ya kufanyiwa uchunguzi.
Matibabu ya maumivu ya uume yanatakiwa kuendana na sababu kuu iliyogundulika.
Epuka kujishughulisha kingono hadi utakapopata tiba kamili.
Mshirikishe mwenza wako katika uchunguzi ikiwa kuna dalili za maambukizi.
Hitimisho
Maumivu ya uume wakati wa kujamiiana yanaweza kutokana na sababu rahisi kama msuguano au muwasho wa ngozi, lakini pia yanaweza kuwa ishara ya maambukizi, tatizo la govi, ugonjwa wa Peyronie, matatizo ya njia ya mkojo au hali nyingine inayohitaji matibabu. Maumivu yanayojirudia si jambo ambalo mwanaume anapaswa kuvumilia au kujitibu bila kujua chanzo.
Uchunguzi wa kitabibu husaidia kutambua chanzo na kuchagua tiba inayofaa. Ikiwa maumivu yanaambatana na vidonda, majimaji yasiyo ya kawaida, damu, homa, maumivu makali ya korodani au uume uliosimama kwa zaidi ya saa nne, huduma ya kitabibu inapaswa kutafutwa kwa wakati unaofaa.
Majina mengine ya makala hii
Makala hii huwa na majina mengine yafuatayo yanayomaanisha maumivu ya uume wakati wa kujamiiana:
Maumivu ya mboo wakati wa kujamiiana
Maumivu ya uume wakati wa kuingiza uume
Maumivu ya uume wakati wa tendo la ndoa
Maumivu ya uume wakati wa ngono
Maumivu ya uume wakati wa kusimama
Maumivu ya uume wakati wa kumwaga shahawa
Maumivu ya uume baada ya kujamiiana
Mboo kuuma wakati wa tendo
Uume kuuma wakati wa tendo
Uume kuungua wakati wa tendo
Uume kuchoma wakati wa tendo
Maumivu ndani ya uume wakati wa tendo
Maumivu kwenye kichwa cha uume wakati wa tendo
Maumivu ya uume baada ya kufika kileleni
Maswali yanayoulizwa mara kwa mara kuhusu maumivu ya uume wakati wa kujamiana(tendo la ndoa)
1. Je, maumivu ya uume wakati wa tendo yanaweza kuwa dalili ya ugonjwa wa zinaa?
Maumivu yanaweza kutokea katika baadhi ya magonjwa ya zinaa, hasa pale maambukizi yanapoathiri mrija wa mkojo, ngozi ya uume au maeneo mengine ya mfumo wa uzazi. Hata hivyo, maumivu pekee hayawezi kutumika kutambua ugonjwa fulani wa zinaa kwa sababu yanaweza pia kusababishwa na matatizo yasiyohusiana na ngono.
Mwanaume anaweza kuwa na dalili kama kuungua wakati wa kukojoa, kutokwa na majimaji, vidonda au malengelenge, lakini baadhi ya maambukizi yanaweza kutokuwa na dalili. Kwa hiyo, kutokuwa na dalili nyingine hakumaanishi kwamba maambukizi hayawezekani.
Ikiwa kumekuwa na tendo bila kinga au kuna uwezekano wa mwenza kuwa na maambukizi, kipimo kinaweza kuwa muhimu. Ni bora kuthibitisha chanzo kwa vipimo kuliko kutumia dawa za maambukizi bila uchunguzi.
2. Kwa nini uume unauma wakati wa kusimama lakini hauumi ukiwa umelala?
Maumivu yanayotokea hasa wakati uume umesimama yanaweza kuhusishwa na mabadiliko yanayotokea kwenye tishu za uume wakati wa kusimama. Kwa mfano, ugonjwa wa Peyronie unaweza kusababisha maumivu wakati wa kusimama pamoja na kujikunja au mabadiliko mengine ya umbo.
Maumivu yanaweza pia kutokana na jeraha la zamani, kovu au uchochezi wa tishu. Katika hali nyingine, mtu anaweza kuwa na maumivu yanayohusiana na shinikizo kwenye maeneo ya uume au nyonga wakati wa kusimama.
Ikiwa maumivu ni mapya, yanaendelea au yanaambatana na kujikunja kwa uume, uvimbe au tatizo la kusimama, ni vizuri kufanyiwa uchunguzi. Daktari anaweza kuhitaji kujua kama mabadiliko ya umbo yalianza lini na kama yamekuwa yakiongezeka.
3. Je, ukavu wakati wa tendo unaweza kusababisha maumivu kwa mwanaume?
Ndiyo, ukavu wa uke wa mwenza unaweza kuongeza msuguano wakati wa tendo na kusababisha ngozi ya uume kupata muwasho, kuungua au maumivu. Hii huwa muhimu zaidi ikiwa tendo ni refu au lina msuguano mkubwa.
Msuguano mkali unaweza pia kusababisha michubuko midogo kwenye ngozi ya uume au govi, hasa kwa mwanaume mwenye ngozi nyeti au govi linalobana. Maumivu yanaweza kuendelea hata baada ya tendo ikiwa ngozi imejeruhiwa.
Kupunguza msuguano kwa kutumia vilainishi salama vinavyofaa kwa kondomu kunaweza kusaidia. Ikiwa maumivu yanaendelea licha ya kupunguza msuguano, ni muhimu kuchunguza sababu nyingine kama maambukizi, mzio au tatizo la ngozi.
4. Je, maumivu ya uume yanaweza kusababishwa na kufanya tendo mara nyingi?
Kufanya tendo mara nyingi kwa muda mfupi kunaweza kusababisha msuguano mkubwa na kuwasha au kujeruhi ngozi ya uume. Hali hii inaweza kuwa na uwezekano mkubwa ikiwa hakuna vilainishi vya kutosha au tendo limekuwa na msuguano mkali.
Maumivu yanayotokana na msuguano kwa kawaida huhisiwa zaidi kwenye ngozi, kichwa cha uume au govi na yanaweza kuambatana na wekundu au hisia ya kuungua. Kupumzisha eneo hilo na kuepuka msuguano zaidi kunaweza kuruhusu ngozi kupona.
Hata hivyo, maumivu yanayojirudia kila unapofanya tendo hayapaswi kuhusishwa moja kwa moja na kufanya tendo mara nyingi. Ikiwa tatizo linaendelea, chanzo kingine kama maambukizi, fimosisi, ugonjwa wa ngozi au tatizo la muundo wa uume kinaweza kuwepo.
5. Kwa nini mwanaume anaweza kupata maumivu baada ya kumwaga shahawa?
Maumivu baada ya kumwaga shahawa yanaweza kutoka kwenye uume, korodani, nyonga au sehemu ya chini ya tumbo. Wakati mwingine yanaweza kuhusishwa na uchochezi au maambukizi katika mfumo wa uzazi au njia ya mkojo.
Kwa baadhi ya wanaume, misuli ya sakafu ya nyonga inaweza pia kuchangia maumivu, hasa ikiwa inakaza kupita kiasi. Maumivu yanaweza kuonekana mara moja baada ya kumwaga au kuendelea kwa muda.
Ikiwa maumivu hutokea mara moja tu na hayarudii, huenda yasiwe na maana kubwa. Lakini maumivu yanayotokea mara kwa mara, hasa yanapoambatana na maumivu wakati wa kukojoa, damu kwenye shahawa, homa au maumivu ya korodani, yanahitaji uchunguzi.
6. Je, govi linalobana linaweza kufanya tendo la ndoa liwe na maumivu?
Govi linalobana linaweza kusababisha maumivu kwa sababu linashindwa kusogea kwa urahisi wakati wa kusimama kwa uume au wakati wa tendo. Msuguano unaweza kulifanya govi livutike kupita kiasi na kusababisha maumivu au michubuko.
Katika baadhi ya wanaume, govi linaweza kupasuka kidogo wakati wa tendo na kuacha kovu. Kovu hilo linaweza kufanya govi lizidi kubana na hivyo kuunda mzunguko wa majeraha na kubana zaidi.
Matibabu hutegemea kiwango cha kubana na chanzo chake. Baadhi ya watu hunufaika na matibabu ya dawa maalumu chini ya ushauri wa daktari, huku wengine wakihitaji utaratibu wa kitabibu kama kutahiriwa. Usilazimishe govi kufunguka kwa nguvu, kwa sababu kufanya hivyo kunaweza kusababisha jeraha.
7. Je, maumivu wakati wa tendo yanaweza kuhusishwa na tatizo la tezi dume?
Matatizo fulani ya tezi dume yanaweza kuhusishwa na maumivu wakati wa kumwaga shahawa au baada ya tendo. Mwanaume anaweza pia kupata maumivu kwenye nyonga, sehemu ya chini ya tumbo, kati ya korodani na njia ya haja kubwa au wakati wa kukojoa.
Hali kama uchochezi wa tezi dume inaweza kuwa na dalili zinazotofautiana. Baadhi ya wanaume hupata homa na dalili za maambukizi, wakati wengine wanaweza kuwa na maumivu ya nyonga yanayodumu bila homa.
Kwa hiyo, maumivu yanayohusiana na kumwaga shahawa hayapaswi kutibiwa kwa kubahatisha. Daktari anaweza kuchunguza mfumo wa mkojo na uzazi na kuamua kama vipimo vya mkojo, damu au uchunguzi mwingine vinahitajika.
8. Je, maumivu ya uume wakati wa tendo yanaweza kusababishwa na mzio wa kondomu?
Ndiyo, mzio au muwasho unaotokana na kondomu unaweza kusababisha wekundu, kuwasha, kuungua na maumivu kwenye ngozi ya uume. Dalili zinaweza kuanza wakati wa tendo au muda mfupi baada ya kutumia kondomu.
Sio kila muwasho unaotokea baada ya kutumia kondomu ni mzio wa mpira unaotengeneza kondomu. Vilainishi, manukato au kemikali nyingine zinazotumika kwenye bidhaa hiyo pia zinaweza kuwa chanzo cha muwasho.
Ikiwa tatizo hutokea kila mara baada ya kutumia aina fulani ya kondomu, ni muhimu kuacha bidhaa inayoshukiwa na kuzungumza na mhudumu wa afya kuhusu mbadala unaofaa. Ikiwa kuna uvimbe mkubwa, shida ya kupumua au dalili kali za mzio, huduma ya dharura inahitajika.
9. Je, jeraha la uume linaweza kusababisha maumivu wakati wa tendo hata baada ya kupona?
Jeraha linaweza kuacha kovu au mabadiliko kwenye tishu za uume ambayo yanaweza kuleta maumivu wakati wa kusimama au kujamiiana hata baada ya jeraha la awali kuonekana kupona. Hii inaweza kutokea kwa sababu tishu zilizopona zinaweza kuwa na unyumbufu tofauti na tishu za kawaida.
Baadhi ya wanaume huanza kuona mabadiliko ya umbo la uume, kujikunja au maumivu wakati wa kusimama baada ya jeraha. Dalili hizi zinapaswa kuchunguzwa, hasa ikiwa zimekuwa zikiongezeka.
Mwanaume mwenye historia ya jeraha na maumivu yanayoendelea hapaswi kujilazimisha kufanya tendo licha ya maumivu. Uchunguzi wa daktari, na wakati mwingine vipimo vya picha, unaweza kusaidia kutathmini kama kuna kovu au uharibifu wa tishu.
10. Ni tofauti gani kati ya maumivu ya uume wakati wa tendo na maumivu ya korodani?
Maumivu ya uume mara nyingi huhisiwa kwenye ngozi, kichwa cha uume, govi au ndani ya mrija wa mkojo, na yanaweza kuhusishwa na msuguano, maambukizi, matatizo ya govi au matatizo ya ngozi. Maumivu yanaweza kuwa ya kuchoma, kuungua au kukata.
Maumivu ya korodani, kwa upande mwingine, yanaweza kutokana na matatizo yanayoathiri korodani au miundo inayozizunguka, kama maambukizi, jeraha au hali nyingine za dharura. Wakati mwingine maumivu ya njia ya mkojo au mawe yanaweza pia kusafiri hadi kwenye korodani au kinena.
Maumivu makali ya ghafla kwenye korodani, hasa upande mmoja, yanahitaji huduma ya haraka, kwa sababu baadhi ya sababu zake zinaweza kuhitaji matibabu ya dharura. Kwa hiyo, ni muhimu kutambua sehemu halisi ya maumivu badala ya kusema tu kwamba “uume unauma.”
11. Je, chango (koliki) linaweza kuwa sababu ya maumivu wakati wa tendo kwa mwanamke?
Ndiyo, chango linaweza kuhusishwa na maumivu wakati wa tendo, lakini si kila maumivu wakati wa tendo husababishwa na chango. Chango ni maumivu yanayotokana na kujikaza kwa misuli ya viungo vya ndani, na kutegemea chanzo chake yanaweza kuhusisha tumbo, utumbo au viungo vya uzazi. Maumivu yanaweza kuongezeka wakati wa tendo kwa sababu ya msukumo na shinikizo kwenye maeneo hayo.
Kwa mfano, chango linalohusiana na hedhi au mikazo ya kizazi linaweza kufanya eneo la chini ya tumbo na nyonga kuwa na maumivu zaidi wakati wa tendo. Hata hivyo, maumivu wakati wa tendo yanaweza pia kutokana na hali nyingine kama maambukizi ya njia ya uzazi, ukavu wa uke, uvimbe kwenye kizazi au ovari, endometriosis, au matatizo ya misuli ya nyonga.
Kwa hiyo, ikiwa maumivu wakati wa tendo yanajirudia, ni makali, yanaendelea baada ya tendo, au yanaambatana na uchafu usio wa kawaida ukeni, kutokwa damu, homa, maumivu makali ya chini ya tumbo au maumivu wakati wa kukojoa, ni muhimu kufanyiwa uchunguzi na mhudumu wa afya ili kubaini chanzo. Chango pekee halipaswi kuchukuliwa kuwa sababu ya maumivu bila kutathmini sababu nyingine zinazowezekana.
ULY CLINIC inakushauri siku zote uwasiliane na daktari wako kwa ushauri na tiba zaidi kabla ya kuchukua hatua yoyote ile ya kiafya baada ya kusoma makala hii.
Wasiliana na daktari wa ulyclinic kwa ushauri zaidi na tiba kwa kutumia namba za simu au kubonyeza link ya Pata Tiba chini ya tovuti hii
Imeandikwa:
4 Septemba 2021, 21:50:19
Soma dalili zingine Zaidi kwa kubonyeza herufi ya mwanzo hapa chini
[A] [B] [C] [D] [E] [F] [G] [H] [I] [J] [K] [L] [M] [N] [O] [P] [Q] [R] [S] [T] [U] [V] [W] [X] [Y] [Z] [Z] [#]
Rejea za mada hii:
Urology Care Foundation. What is STD? Available from: Urology Care Foundation. Accessed September 4, 2021.
International Society for Sexual Medicine. What is phimosis? Available from: International Society for Sexual Medicine. Accessed September 4, 2021.
Harvard Medical School. Priapism. Available from: FamilyDoctor.org. Accessed September 4, 2021.
Marfatia YS, Patel D, Menon DS, Naswa S. Genital contact allergy: A diagnosis missed. Indian J Sex Transm Dis AIDS. 2016;37(1):1–6. Available from: PubMed Central.
Turley KR, et al. Evolving ideas about the male refractory period. BJU Int. 2013. Available from: BJU International. Accessed September 4, 2021.