Dalili na viashiria vya magonjwa mbalimbali
Unashauriwa kufuata ushauri wa daktari wako kabla ya kuchukua hatua yoyote ile baada ya kusoma makala. Bofya picha au neno soma zaidi ili kuingia kwenye makala kwa undani.
Vipele kwa mwenye VVU
Vipele vya ngozi hutokea kwa asilimia 90 ya watu wanaoishi na VVU wakati fulani, na wakati mwingine ndio dalili ya kwanza. Wiki 2 hadi 6 baada ya kuambukizwa, vipele vyekundu vya mwili mzima pamoja na homa vinaweza kutokea. Baadaye, kinga ikishuka, hutokea vipele vya muwasho (PPE), folikulaitisi ya eosinofili, mkanda wa jeshi, molaskamu, fangasi, seborrhoeic dermatitis, kaswende, saratani ya Kaposi na mzio wa dawa. Kupima VVU na kuanza ARV ndio msingi; vipele vingi hupungua kinga ikiinuka.
Ngozi ya pumbu kubanduka
Ngozi ya mfuko wa korodani (pumbu) kubanduka mara nyingi hutokana na fangasi, jasho na msuguano, mzio wa sabuni au mafuta, ukurutu na kujikuna. Huambatana na kuwasha, wekundu na wakati mwingine kuwaka moto. Kuweka eneo kavu, nguo za pamba na cream ya fangasi husaidia wengi. Kubanduka pamoja na vidonda, malengelenge, usaha au homa kunahitaji mtoa huduma.
Uvimbe kwenye kizazi
"Uvimbe kwenye kizazi" ni neno la jumla linalojumuisha hali nyingi tofauti: faibroidi (uvimbe wa misuli usio wa saratani – unaotokea zaidi), adenomyosisi, vinyama vya utando wa ndani (polyps), utando wa ndani kukua kupita kiasi (hyperplasia), mimba zabibu, na saratani (ya utando wa ndani, ya misuli, ya shingo ya kizazi). Dalili za pamoja ni hedhi nyingi au ya muda mrefu, damu nje ya hedhi, maumivu ya tumbo la chini, tumbo kuongezeka, kukojoa mara kwa mara na ugumba. Ultrasound hutofautisha; damu baada ya komahedhi daima inahitaji uchunguzi.
Damu nyingi mwilini (polisaithemia)
Damu nyingi mwilini (polisaithemia) ni kuwa na himoglobini au chembe nyekundu za damu nyingi kupita kawaida, hivyo damu kuwa nzito. Mara nyingi hugundulika kwa kipimo cha damu bila dalili. Visababishi ni sigara, magonjwa ya mapafu, kukoroma kwa kusimama kupumua, testosterone, upungufu wa maji, au ugonjwa wa uboho (polycythaemia vera). Huongeza hatari ya damu kuganda.
Dalili za awali za uchungu
Dalili za awali za uchungu wa kujifungua hutofautiana kati ya mjamzito mmoja na mwingine. Zinazoonekana zaidi ni mikazo ya tumbo inayokuja kwa mpangilio na kuongezeka nguvu, maumivu ya mgongo wa chini, kutoka kwa ute mzito wenye michirizi ya damu (kifuniko cha shingo ya kizazi), hisia za kutaka kujisaidia kwa sababu ya mtoto kushuka, na wakati mwingine maji kutoka ukeni.