Dalili na viashiria vya magonjwa mbalimbali
Unashauriwa kufuata ushauri wa daktari wako kabla ya kuchukua hatua yoyote ile baada ya kusoma makala. Bofya picha au neno soma zaidi ili kuingia kwenye makala kwa undani.
Maumivu ya hedhi (dysmenorrhoea)
Maumivu ya hedhi (dysmenorrhoea) ni maumivu ya kubana tumbo la chini, wakati mwingine yakishuka kiunoni na mapajani, yanayoanza kabla au mwanzoni mwa hedhi na kudumu siku 1 hadi 3. Kwa wasichana na wanawake vijana mara nyingi ni ya kawaida (primary) – husababishwa na kemikali za prostaglandin. Maumivu yanayoanza baada ya miaka 25, yanayoongezeka kila mwaka, au pamoja na hedhi nyingi, maumivu ya tendo na ugumba (secondary) huashiria endometriosisi, adenomyosisi, faibroidi au PID. Dawa za maumivu za kupunguza uvimbe (NSAIDs) na vidonge vya homoni husaidia wengi.
Matatizo ya kutokwa na damu ukeni
Hedhi ya kawaida huja kila siku 24 hadi 38, hudumu hadi siku 8 na haiathiri maisha yako. Kutokwa na damu ukeni isiyo ya kawaida ni hedhi nyingi, ya muda mrefu, isiyo ya mpangilio, damu kati ya hedhi, baada ya tendo, au baada ya komahedhi. Kwanza ondoa mimba (pamoja na mimba kuharibika na mimba nje ya kizazi). Visababishi vikuu ni homoni na uzazi wa mpango, faibroidi, polyps, adenomyosisi, maambukizi, matatizo ya kuganda kwa damu, na saratani ya shingo ya kizazi au utando wa ndani.
Hedhi ya muda mrefu
Hedhi ya muda mrefu ni hedhi inayodumu zaidi ya siku 8, mara nyingi pamoja na damu nyingi (menorrhagia). Visababishi vikuu ni yai kutopevuka (balehe, karibu na komahedhi, PCOS, tezi ya shingo), faibroidi, adenomyosisi, polyps, kitanzi cha shaba, matatizo ya kuganda kwa damu na hyperplasia. Huleta upungufu wa damu – uchovu, kizunguzungu na weupe. Dawa za kupunguza damu, homoni na kutibu chanzo husaidia wengi.
Damu kutoka muda mrefu bila kukata
Damu kutoka ukeni kwa wiki kadhaa bila kukata mara nyingi husababishwa na njia za uzazi wa mpango za homoni (kipandikizi, sindano ya depo, vidonge vya progestin pekee), yai kutopevuka (PCOS, karibu na komahedhi), mimba iliyoharibika ikabaki (mabaki), polyps, faibroidi, maambukizi ya kizazi na mara chache saratani. Ondoa mimba kwanza. Damu nyingi, kizunguzungu, homa au harufu mbaya vinahitaji hospitali.
Matone ya damu kila siku nje ya hedhi
Matone ya damu (spotting) ni damu kidogo – madoa kwenye nguo ya ndani au karatasi – nje ya siku za hedhi. Mara nyingi hutokana na uzazi wa mpango wa homoni, ovulesheni (katikati ya mzunguko, siku 1 hadi 2), mwanzo wa ujauzito (implantation), maambukizi ya shingo ya kizazi (klamidia), polyps na michubuko baada ya tendo. Matone kila siku kwa zaidi ya wiki 2, baada ya tendo mara kwa mara, au baada ya komahedhi yanahitaji uchunguzi wa shingo ya kizazi.