Dalili za mimba ya miezi saba

Utangulizi

Mimba ya miezi saba ni sawa na mimba ya wiki 25 hadi 28, huwa ni mwanzo wa  kipindi cha tatu cha ujauzito. Kipindi hiki huambatana na mabadiliko ya kimwili na kihisia kutokana na ukuaji wa haraka wa mtoto tumboni. Mama mjamzito anaweza kuhisi mchanganyiko wa furaha na wasiwasi kadri siku ya kujifungua inavyokaribia. Kuelewa dalili, tahadhari muhimu, na ishara za hatari kunaweza kusaidia kuhakikisha afya na usalama wa mama na mtoto.

Je, ni zipi dalili za mimba ya miezi saba?

Katika mwezi huu, dalili nyingi za ujauzito huongezeka kutokana na ukubwa wa mtoto na mabadiliko ya mwili wa mama. Dalili za kawaida ni pamoja na:

• Mikazo ya Braxton Hicks: Mikazo isiyo ya maumivu, ambayo husaidia kuandaa mfuko wa uzazi kwa ajili ya kujifungua

• Kupumua kwa shida: Tumbo la uzazi linapokua, linaweza kushinikiza kiwambo cha mapafu, na kusababisha upungufu wa hewa

• Uvimbaji: Miguu na vifundo vya miguu huweza kuvimba kutokana na kuongezeka kwa maji mwilini na shinikizo kwenye mishipa ya damu

• Kukojoa mara kwa mara: Mji wa mimba unapokua, hushinikiza kibofu cha mkojo na kuongeza haja ya kukojoa

• Maumivu ya mgongo na nyonga: Hii hutokana na ongezeko la uzito na kulegea kwa ligamenti za nyonga

• Uchovu na kukosa usingizi: Maumivu na mabadiliko ya homoni hufanya mama kushindwa kulala

• Mabadiliko ya kihisia: Wasiwasi kuhusu kujifungua, hasira za ghafla na hisia kali ni za kawaida

  
  

Mambo ya Kuzingatia

Katika mwezi wa saba wa ujauzito, ni muhimu kuzingatia mambo yafuatayo:

• Hudhuria kilini ya ujauzito kama unavyopangiwa

• Kula mlo kamili wenye madini chuma, asidi ya foliki nk

• Fanya mazoezi mepesi kama kutembea au yoga, itakusaidia kupunguza msongo wa mawazo, kudhibiti uzito na kuboresha mzunguko wa damu

• Tayarisha Mpango wa Kujifungua: Chagua hospitali, maandalizi ya nyumbani, na rasilimali zitakazohitajika

• Epuka Kusafiri umbali mrefu, hasa kwa ndege, kwani kunaweza kuwepo na vikwazo au hatari za kiafya.

Je, ni wakati gani unapaswa kumuona daktari?

Licha ya kwamba dalili nyingi ni za kawaida, zifuatazo ni dalili za hatari zinazohitaji uangalizi wa haraka wa kitabibu:

• Maumivu makali ya tumbo au mgongo

• Kichwa kuuma sana au kuona ukungu 

• Kuvimba kwa uso au mikono ghafla 

• Kutokwa damu au maji ukeni

• Kupungua kwa mijongeo ya mtoto tumboni

• Dalili za homa au maambukizi

  
  

  Wapi utapata maelezo zaidi kuhusu mimba ya miezi saba?

  Ili  kupata maelezo zaidi kuhusu mimba ya miezi saba bofya hapa.