Kuzimia kutokana na vasovagal

Kuzimia kwa vasovagal ni hali inayotokea pale ambapo mfumo wa fahamu wa parasimpathetiki, hasa mshipa wa vagus, hufanya kazi kupita kiasi. Hali hii husababisha kushuka kwa ghafla kwa shinikizo la damu na mapigo ya moyo, hivyo kupunguza kiasi cha damu kinachofika kwenye ubongo. Matokeo yake, mtu hupoteza fahamu kwa muda mfupi.

Uchochezi wa mshipa wa vagus unaweza kutokea kutokana na mambo kama:

• Kuona damu

• Mshtuko wa hisia

• Uchungu

• Hofu kali

Kwa kawaida, kuzimia kwa vasovagal si tatizo hatari, na watu wengi hurudi katika hali yao ya kawaida ndani ya dakika chache. Hata hivyo, hatari kubwa inaweza kuwa kuumia wakati wa kuanguka, hivyo ushauri wa daktari unaweza kuwa muhimu ili kuondoa uwezekano wa tatizo la moyo au tatizo lingine linalofanana na dalili hizi.

Dalili na viashiria

Dalili za mwanzo (Unazozihisi kabla ya kuzimia)

Mtu anaweza kupata viashiria vifuatavyo kabla ya kupoteza fahamu:

• Kubadilika kwa rangi ya ngozi (kuwa myeupe)

• Kichwa kuwa chepesi au kuzunguka

• Kuona ukungu au kuona vitu vilivyo mbele tu

• Kichefuchefu

• Kuhisi joto kupita kiasi

• Kutokwa na jasho baridi

• Kupiga mwayo

• Kuongezeka kwa hali ya uchovu ghafla

Dalili zinazoonekana kwa watazamaji

Watu waliokaribu wanaweza kuona:

• Mienendo isiyo ya kawaida (kama kudondoka polepole au kukakamaa kwa muda mfupi)

• Mapigo ya mishipa kuwa dhaifu na ya taratibu

• Mboni za macho kupanuka

Visababishi

Kuzimia kwa vasovagal hutokea pale ambapo sehemu ya mwili inayodhibiti mapigo ya moyo na shinikizo la damu haifanyi kazi vizuri inapokutana na kichocheo fulani, kama vile kuona damu au kupata huzuni kali.

Wakati hii inatokea:

• Mapigo ya moyo hupungua ghafla

• Mishipa ya damu hasa kwenye miguu hutanuka

Mabadiliko haya husababisha damu kukwama zaidi kwenye miguu na kupungua kurudi juu kuelekea kwenye ubongo. Kupungua kwa shinikizo la damu na kupungua kwa kasi ya mapigo ya moyo kunasababisha kiwango cha damu kinachofika kwenye ubongo kushuka, na hapo mtu anaweza kuzimia.

Vichocheo vinavyosababisha vasovagal mara kwa mara

Mara nyingi hakuna sababu mahususi ya msingi inayopelekea vasovagal, lakini kuna vichocheo vinavyoonekana kusababisha hali hii mara kwa mara:

• Kusimama kwa muda mrefu bila kusogea

• Kukaa kwenye mazingira yenye joto kali

• Kuona damu

• Kupata sindano au kutolewa damu

• Mshtuko wa hisia au hofu ya kuumia

• Kusukuma kwa nguvu, kama wakati wa kutoa haja kubwa (kukenya)

• Uchovu mkali au kuwa na maji mwilini kwa kiwango kidogo

Kuzimia wakati wa kukojoa

Hii ni aina maalumu ya kuzimia inayotokea mtu anapokojoa, hususan usiku. Husababishwa na:

• Kupumzika kwa mwili kupita kiasi wakati wa kukojoa

• Kushuka kwa shinikizo la damu kutokana na kuachia kibofu kilichokuwa kimejaa

• Kusimama ghafla kutoka kitandani usiku

Hali hii ni sehemu ya vasovagal na mara nyingi si hatari, lakini inahitaji tahadhari ili kuepuka kuanguka vibaya.

Je, kuzimia kwa vasovagal ni hatari?

Kwa kawaida, si hatari. Lakini linaweza kuwa tatizo ikiwa:

• Hutokea mara nyingi

• Unazimia bila dalili za onyo

• Unajeruhiwa wakati wa kuanguka

• Una historia ya matatizo ya moyo

Vipimo na utambuzi

Kutambua aina hii ya kuzimia hufanyika kwa kujiridhisha kwamba hakuna tatizo jingine linalopelekea hali hii ya kuzimia-sana matatizo ya moyo. Vipimo hivyo ni pamoja na;

Kipimo cha ECG

Kinachorekodi umeme unaozalishwa na moyo na tabia zake. Huweza kutambua mapigo ya moyo yasiyo kawaida na matatizo mengije ya moyo. Kwa nchi zilizoendelea kipimo hiki huweza kuwa kidogo kiasi kwambakikavaliwa na kikachukua rekodi kwa wiki nzima kasha kuangaliwa na daktari. Kama kipimo hiki cha kuvaliwa hakipo basi kuna mbadala wake ambapo kitachukua rekodi hapo hapo kutoka kwenye kifua.

ECHO

hiki ni kipimo cha ultrasound ya moyo, huangalia moyo na matatizo yanayoweza kuwa kwenye kuta na milango ya moyo yanayoweza kusababisha kuzimia.

Kipimo cha uwezo wa kuhimili mazoezi

Kipimo hiki hufanyika ili kuona mapigo ya moyo wakati unakimbia kwenye kifaa maalumu cha mazoezi kinachoitwa treadmill.

Kipimo cha damu

Kuangalia hali kama upungufu wa damu ambao unaweza changia hali ya kuzimia.

​

Matibabu

Kwa watu wengi matibabu ya kuzimia kwa vasovagal hayana ulazima. Daktari atakusaidia kutambua visababishi vya kuzimia kwako na mkashauriana njia ya kujizuia navyo.

Hata hivyo kama unapata vipindi vingi vya kuzimia kutokana na vasovagal na kuwa na mwingiliano na maisha yako daktari anaweza kukushauri kujalibu moja kati ya yafuaayo;

Dawa

Dawa inayoitwa fludrocortisones acetate inayotumika kutibu shinikizo la chini la damu ili kuzuia kuzimia kwa vasovagal. Dawa za zuizi za serotonin chaguzi pia zinaweza kutumia (SSI)

Mazoezi

Daktari atakushauri njia za kuzuia kujamu kwa damu kwenye miguu. Ikiwemo mazoezi ya miguu, kuvaa soksi maalumu, au kukaza misuli ya miguu unapokuwa umesimama.

Unaweza hitaji kuongeza chumvi kidogo kwenye chakula chako kama huna shinikizo la damu la juu. Zuia kusimama mda mrefu- haswa kwenye jua kali, sehemu kwenye msongamano wa watu na kunywa maji ya kutosha.

Upasuaji

Kwa nadra sana, unaweza kufanyia upasuaji wa kuwekewa kifaa kinachorekebisha mapigo ya moyo kwenye kifua, hili huweza kusaidia kuondoa hali hii ya kuzimia kwa vasovagal endapo matibabu mengine hayajakusaidia. Matibu haya huwa ya gharama.

Nini cha kufanya wakati unahisi utazimia

• Kaa chini au lala kwa mgongo mara moja

• Inua miguu juu ya usawa wa mwili kidogo ili kuongeza mtiririko wa damu kwenda kwenye ubongo

• Pumua taratibu kwa kina

• Kunywa maji mara tu unaposimama vizuri

• Epuka kutoka kwenye sehemu yenye joto au msongamano

Jinsi ya kuzuia vasovagal na kuzimia wakati wa kukojoa

• Epuka kusimama muda mrefu bila kupumzika

• Kunywa maji ya kutosha

• Usikojoe ukiwa umesimama ikiwa umewahi kuzimia wakati wa kukojoa — kaa au kaa nusu squat

• Usisimame ghafla kutoka kitandani, hasa usiku

• Kula vyakula vyenye chumvi kiasi (kwa ushauri wa daktari) ikiwa shinikizo la damu limekuwa likishuka mara kwa mara

• Fanya mazoezi mepesi ya kuimarisha mzunguko wa damu

Maswali yaliyoulizwa mara kwa mara na majibu yake