Wanawake wengi hupata hofu au mshangao wanapoona damu kwa siku moja au mbili, kisha baada ya muda mfupi wakapima na kugundua kuwa ni wajawazito. Hali hii huibua maswali mengi kama: “Je, nilipata hedhi nikiwa mjamzito?” au “Inawezekanaje kuona damu halafu nikawa na mimba?”

Kitaalamu, mara nyingi mwanamke hawezi kupata hedhi ya kweli akiwa tayari ana ujauzito isipokuwa kwenye hali maalumu kama zilizoorodheshwa katika makala ya hedhi wakati wa ujauzito. Hata hivyo, kuna aina za damu zinazoweza kutoka mwanzoni mwa ujauzito na zikafanana sana na hedhi, hasa zinapodumu siku moja au mbili.

Makala hii inalenga kutoa elimu sahihi kwa mwanamke, ili kuondoa hofu, imani potofu, na kuchelewa kutafuta huduma za afya.

Je, damu hii ni hedhi ya kweli?

Hapana. Damu ya siku moja au mbili inayotokea kabla ya kugundua ujauzito mara nyingi si hedhi ya kweli, bali ni damu inayotokana na mabadiliko yanayotokea mwanzoni mwa ujauzito.

Hedhi ya kweli hutokea pale ambapo:

• Hakuna ujauzito

• Ukuta wa mfuko wa uzazi (utando laini wa ndai ya kizazi) huondolewa

Wakati wa ujauzito, ukuta huu huhifadhiwa ili kuendeleza mimba, hivyo hedhi ya kawaida haiwezi kutokea.

Visababishi vya kuona damu kabla ya kujua una Ujauzito

1. Damu ya kujipandikiza kwa yai lililochavushwa

Wakati na baada ya yai lililorutubishwa kujipandikiza kwenye mfuko wa uzazi:

• Mishipa midogo ya damu hupasuka

• Damu hutoka kidogo sana

• Hudumu siku 1–2

Hii ndiyo sababu ya kawaida zaidi ya hali hii.

2. Mabadiliko ya homoni za mwanzoni mwa ujauzito

Mwanzoni mwa ujauzito, homoni hubadilika kwa haraka, jambo linaloweza:

• Kusababisha damu kidogo kutoka

• Kufanya damu ionekane na kisha ikome ghafla

3. Damu kutoka kwenye shingo ya kizazi (Seviksi)

Katika ujauzito wa awali:

• Shingo ya kizazi huwa laini na yenye damu nyingi

• Tendo la ndoa au maambukizi madogo yanaweza kusababisha damu kiasi kutoka

4. Mabaki ya damu ya mzunguko uliopita

Wakati mwingine:

• Damu iliyobaki kwenye mfuko wa uzazi hutoka baadaye

• Huonekana kama damu mpya lakini si hedhi halisi

Damu hii huwa na sifa gani?

Kwa kawaida:

• Huwa kidogo

• Hudumu siku 1 au 2

• Mara nyingi haina mabonge makubwa

• Haina maumivu makali ya tumbo

Damu nzito, inayoendelea, au yenye maumivu makali si ya kawaida na huhitaji uchunguzi wa haraka.

Je, ni lini uonane na Daktari?

Wasiliana na mtaalamu wa afya haraka ikiwa:

• Damu inaongezeka au kudumu zaidi ya siku 2–3

• Kuna maumivu makali ya tumbo la chini

• Kipimo cha mimba ni chanya na damu inaendelea

• Kuna kizunguzungu kikali au udhaifu

Hii ni muhimu kuondoa hatari kama mimba nje ya mfuko wa uzazi.

Ujumbe muhimu wa Afya (ULY Clinic)

Hitimisho

Damu ya siku moja au mbili kabla ya kugundua ujauzito si hedhi ya kweli, bali mara nyingi husababishwa na damu ya upandikizaji wa yai au mabadiliko ya homoni.Mwanamke anapaswa kupima ujauzito mapema na kumuona mtaalamu wa afya endapo damu itaendelea au kuambatana na maumivu.

Maswali yanayoulizwa Mara kwa Mara na majibu yake