Kutoshika mimba kwa muda mrefu: Visababishi na hatua za kuchukua ni zipi?

Swali na maelezo ya msingi

Majibu

Ugumba wa pili ni nini?

Ugumba wa pili ni hali ambapo mwanamke aliyeahi kupata ujauzito awali hushindwa kushika tena mimba baada ya miezi 12 au zaidi ya kujaribu (au miezi 6 kwa wanawake wenye umri zaidi ya miaka 35). Ni hali ya kawaida inayowaathiri wanawake wengi walio na historia ya mimba zilizopita.

Visababishi vya kutopata mimba

Sababu zinazowezekana kwa kisa kama hiki ni

1. Uovuleshaji usio wa kawaida

Hali ambapo yai halitolewi kwa mpangilio sahihi kutoka kwenye ovari. Mzunguko wa hedhi unaobadilika-badilika ni ishara ya tatizo hili.

Visababishi vya uovuleshaji usio wa kawaida unaweza kuwa:

• Sindromu ya vifukomaji vingi kwenye ovari (PCOS)

• Msongo wa mawazo

• Uzito kupita kiasi au upungufu wa uzito

• Mabadiliko ya homoni (TSH, Prolactin)

Vipimo vya utambuzi:

• FSH, LH, Prolactin, TSH, AMH

• Ultrasound ya ovari

2. Mirija ya uzazi iliyojiziba

Magonjwa ya zinaa kama klamidia au PID yanaweza kusababisha mirija ya uzazi kupata makovu na kuziba. Hii huzuia yai kusafiri kwenda kurutubishwa.

Kipimo muhimu cha utambuzi

Hysterosalpingogram (HSG) – kuangalia kama hali ya mirija ya uzazi kama imeziba au la na kama ipo kawaida au la.

3. Mabadiliko kwenye mji wa mimba

Historia ya mimba kutoka au utoaji wa mimba unaweza kusababisha makovu ndani ya kizazi (Sindromu ya Asherman) au mabadiliko mengine yanayozuia ujauzito kutungwa.

Vipimo vya utambuzi

• Ultrasound ya uke

• Hysteroscopi

4. Manii za mwanaume kukosa ubora

Ingawa mume ana watoto, bado anaweza kuwa na matatizo kwa sasa. Umri, dawa, au mtindo wa maisha huweza kushusha ubora wa mbegu na hivyo ni lazima mwanaume pia kuchunguzwa afya yake.

Kipimo muhimu kufanyika ni kile cha kuangalia ubora wa mbegu zake.

Vipimo muhimu vya awali

Vipimo vifuatavyo ni muhimu kufanyika katika hatua za awali za kufahamu kisababishi;

Visababishi vingine vya ugumba

Si lazima kwa kisa hiki lakini ni muhimu kufahamu

1. Endometriosis

Tishu za kizazi kukua nje ya mji wa mimba, huleta maumivu na ugumba.

2. Tatizo la kinga ya mwili

Mwili kutengeneza kingamwili dhidi ya mbegu au yai.

3. Makovu kwenye kiazi

Kwa mfano, Asherman’s syndrome baada ya D&C au utoaji wa mimba usio salama.

4. Umri mkubwa wa uzazi

Mimba hupungua kwa kasi baada ya miaka 35.

5. Dawa au tiba za mionzi

Dawa za saratani, mionzi au baadhi ya dawa maalum huathiri uzazi.

6. Msongo wa mawazo

Stress huathiri homoni za ovulation na kupunguza nafasi ya kushika mimba.

7. Ugumba usioelezeka

Wote wawili wanaonekana kawaida lakini mimba haitungi – hali hii huwatokea hata asilimia 15 ya wanandoa.

Hatua unazoweza kuchukua

1. Onana na daktari bingwa wa magonjwa ya wanawake/mtaalamu wa uzazi

2. Fanya vipimo vya msingi haraka iwezekanavyo (wewe na mume wako)

3. Fuatilia ovulation nyumbani au kwa daktari

4. Dhibiti uzito na msongo wa mawazo

5. Epuka dawa za mitishamba bila ushauri wa kitabibu

6. Kunywa folic acid kila siku

Hitimisho

Kutopata mimba baada ya muda mrefu wa kujaribu siyo mwisho wa matumaini. Sababu nyingi zinaweza kutibika, hasa zikigundulika mapema. Muhimu zaidi ni:

• Kufanya uchunguzi wa kitaalamu,

• Kuepuka kubahatisha dawa au ushauri wa mitaani,

• Kuelimika kuhusu mwili wako.

Matibabu yapo. Muda ndio silaha muhimu zaidi.