Dalili na viashiria vya magonjwa mbalimbali

Ute wa kawaida ukeni ni safi au mweupe, usio na harufu mbaya, na hubadilika katika mzunguko wa hedhi – mzito na mweupe baada ya hedhi, mwingi, safi na unaovutika kama ute wa yai wakati wa ovulesheni. Mweupe mzito kama maziwa mgando na kuwasha ni fangasi; kijivu chenye harufu ya samaki ni BV; njano-kijani wenye povu ni trichomonas; njano au mchafu unaweza kuwa kisonono au klamidia; kahawia au pinki mara nyingi ni damu ya zamani. Ute wenye damu nje ya hedhi au baada ya komahedhi unahitaji uchunguzi.

Uke wenye afya una harufu hafifu ya kawaida. Harufu mbaya, hasa ya samaki inayoongezeka baada ya tendo au wakati wa hedhi, mara nyingi ni vajinosisi ya bakteria (BV). Trichomonas huleta harufu pamoja na uchafu wa njano-kijani wenye povu na kuwasha. Kitu kilichosahaulika ukeni huleta harufu kali sana. Jasho, usafi, nguo zinazobana na kuosha ndani ya uke huchangia. Usitumie manukato wala dawa za kienyeji ukeni – huongeza tatizo.

​

Vidonda ukeni na kwenye mashavu ya uke mara nyingi husababishwa na magonjwa ya zinaa – herpes (malengelenge madogo yanayouma na kurudi), kaswende (kidonda kisichouma) na pangusa (vidonda vinavyouma na mitoki ya kinena). Michubuko ya tendo, fangasi kali, kujikuna, mzio wa dawa na mara chache saratani pia husababisha. Kila kidonda kipimwe pamoja na VVU na kaswende; mwenzi atibiwe. Kwa mjamzito, herpes na kaswende vinaweza kumwathiri mtoto.

Jipu sehemu za siri kwa mwanamke ni mkusanyiko wa usaha ndani ya tishu za eneo la siri, unaotokana na maambukizi ya bakteria. Huweza kutokea kwenye ngozi ya mashavu ya uke, eneo lenye nywele, kinena, mlango wa uke, au kwenye tezi ya Bartholin iliyo upande mmoja wa mlango wa uke. Visababishi vikuu ni michubuko na kunyoa, nywele kuota ndani ya ngozi, kuziba kwa vinyweleo au tezi, na hali zinazopunguza kinga kama kisukari.