Kipimo cha UKIMWI positive

Kipimo cha UKIMWI (HIV test) ni kipimo muhimu kinachosaidia kubaini kama mtu ameambukizwa Virusi vya Ukimwi (VVU). Majibu ya kipimo hiki huweza kuwa ya aina tatu: HIV negative (hasi), HIV positive (chanya) au majibu tatanishi (indeterminate).

Makala hii inalenga kufafanua kwa kina maana ya majibu chanya (HIV positive), sababu zinazoweza kuhusika, na hatua sahihi za kuchukua baada ya kupata majibu hayo.

Kipimo cha UKIMWI kuwa Positive humaanisha nini?

Kupata majibu chanya ya kipimo cha UKIMWI humaanisha kuwa kipimo kimegundua dalili za mwitikio wa kinga au chembe zinazohusiana na maambukizi ya VVU kwenye damu.

Hata hivyo, ni muhimu kuelewa kuwa kipimo cha awali (hasa cha haraka au cha kujipima nyumbani) hakitoshi kuthibitisha maambukizi bila kipimo cha uthibitisho, isipokuwa kipimo kilichofanyika ni cha kutambua vinasaba vya virusi (kama HIV PCR).

Je, kuna visababishi vingine vinavyopelekea majibu ya kipimo cha UKIMWI kuwa positive?

Ndiyo. Ingawa maambukizi ya VVU ndiyo sababu kuu, kuna hali nyingine nadra zinazoweza kuhusishwa na majibu chanya yasiyo ya kweli, zikiwemo:

• Maambukizi ya magonjwa mengine kama Kirusi cha Epstein–Barr, malaria au babesiosis

• Hitilafu za kiufundi wakati wa kupima, kama matumizi mabaya ya kifaa au kuchanganyika kwa sampuli

• Magonjwa ya mfumo wa kinga kushambulia mwili wenyewe (shambulio binafsi la kinga) kama lupus

• Kupata chanjo fulani hivi karibuni, hasa kwa muda mfupi kabla ya kupima

• Hali fulani za mwili, kama kiwango cha juu cha bilirubin kwenye damu

Ndiyo maana vipimo vya uthibitisho ni hatua ya lazima kabla ya kutoa hitimisho.

Je nifanyaje kama majibu ya kipimo cha ukimwi ni positive?

Iwapo umejipima nyumbani na majibu yakawa chanya:

1. Usihitimishe moja kwa moja kuwa una VVU

2. Wasiliana na mtaalamu wa afya au kituo cha huduma za VVU mara moja

3. Rudia kipimo kwa kutumia miongozo ya kitaifa ya upimaji

4. Fanya kipimo cha uthibitisho kabla ya kuanza dawa yoyote

Kama vipimo vitathibitisha maambukizi, utaanza tiba ya dawa za kufubaza virusi (ART) mapema, jambo linalokuwezesha kuishi maisha marefu na yenye afya.

Picha ya majibu ya kipimo cha Virusi vya ukimwi

Kwa makala ya tafsiri ya picha hapo juu na kusoma majibu ya ukimwi positive ingia kwenye makala ya majibu 7 ya kipimo cha Kirusi cha UKIMWI. Na ikiwa majibu ya kipimo chako yamebadilika kuwa positive baada ya kusoma upya baada ya masaa machache kupita, soma katika makala ya kubadilika kwa majibu ya kipimo cha ukimwi.

Hitimisho

Kupata majibu chanya ya kipimo cha UKIMWI si mwisho wa maisha. Hatua sahihi, taarifa sahihi na matibabu ya mapema ndivyo vinavyobadilisha kabisa mwelekeo wa maisha ya mtu mwenye VVU.

Maswali na majibu yaliyoulizwa mara kwa mara na majibu yake