Uwezekano wa kupata mimba baada ya kufungua mirija ya uzazi

Jibu kwa ufupi

Swali la mteja: "Habari daktari, mwanamke aliyefunga kizazi kwa kukatwa mirija (BTL) ana uwezekano wa kufungua tena na kupata ujauzito?"

Jibu kwa ufupi: Ndiyo, inawezekana kwa baadhi, lakini si kwa uhakika. Inategemea umri, jinsi mirija ilivyofungwa na urefu uliobaki. BTL inapaswa kuchukuliwa kama njia ya kudumu.

Maelezo

BTL ni nini

Ni njia ya kudumu ya uzazi wa mpango ambapo mirija ya uzazi (Falopia) hukatwa, hufungwa au huzibwa ili yai na mbegu za kiume visikutane.

Kuunganisha mirija

• Hufaa zaidi kama mirija ilifungwa kwa klipu au pete, na urefu wa kutosha umebaki.

• Hufaa zaidi kwa mwanamke chini ya miaka 37 hadi 40.

• Mafanikio ni asilimia 30 hadi 70; hupungua kadri umri unavyoongezeka.

• Hatari ya mimba kutunga nje ya kizazi huongezeka (takriban 5 hadi 10 kati ya 100).

• Gharama kubwa; hufanyika hospitali chache zenye wataalamu.

Njia mbadala – IVF

• Yai na mbegu hukutanishwa maabara, kiinitete hupandikizwa kizazini.

• Haitegemei mirija.

• Inapatikana katika vituo vichache Tanzania; gharama ni kubwa.

Nini cha kufanya

• Onana na daktari bingwa wa uzazi kwa uchunguzi.

• Pata ripoti ya upasuaji wa BTL – inaonyesha njia iliyotumika.

• Mwenzi apimwe mbegu kabla ya kuamua.

• Kama bado hujafanya BTL na huna uhakika – fikiria njia za muda mrefu zinazorudishika kama kipandikizi au kitanzi.

Dalili za hatari

Baada ya kuunganisha mirija, nenda hospitali mara moja ukiwa na:

• Hedhi imechelewa na maumivu makali upande mmoja wa tumbo, kizunguzungu au kuzimia – mimba nje ya kizazi.

Lini umwone daktari

• Unataka mtoto baada ya BTL – kwa ushauri wa bingwa.

• Hujapata mimba mwaka 1 baada ya kuunganisha mirija – soma Ugumba.

• Una mimba baada ya kuunganisha mirija – ultrasound mapema kuthibitisha iko kizazini.

Maswali yanayoulizwa mara kwa mara