Rhubabi ni nini?

Rhubabi ni mmea ambao kibotania huainishwa kama mboga, lakini mara nyingi hutumiwa kama tunda katika mapishi, hasa katika kutengeneza pie. Mashina yake yanafanana na celery kwa umbo, lakini huwa na rangi ya waridi hadi nyekundu. Ladha yake ni kali na chachu, huku mashina machanga yakiwa laini zaidi kuliko yale yaliyokomaa.

Familia: Polygonaceae

Majina ya kisayansi: Rheum officinale, Rheum palmatum, Rheum rhaponticum

Majina ya kawaida: Rhubabi, Rhubarb, Rheum

Rhubabi ina kiasi fulani cha vitamini C, pamoja na nyuzi lishe, potasiamu, kalishiamu na madini mengine.

Huchangia afya ya kinga ya mwili

Rhubabi mbichi ina vitamini C, kirutubisho kinachohitajika kwa utendaji wa kawaida wa mfumo wa kinga. Vitamini C pia hushiriki katika utengenezaji wa kolajeni na husaidia mwili kunyonya chuma kutoka kwenye vyakula vya mimea.

Husaidia mfumo wa chakula

Rhubabi ina nyuzi lishe, ambazo husaidia kuongeza ujazo wa kinyesi na kusaidia utendaji wa kawaida wa mfumo wa chakula.

Nusu kikombe cha rhubabi mbichi, chenye takribani gramu 61, kina karibu gramu 1 ya nyuzi lishe.

Hutoa potasiamu na kalishiamu

Rhubabi ina kiasi cha potasiamu na kalishiamu. Potasiamu ni muhimu kwa utendaji wa kawaida wa misuli na mfumo wa neva, wakati kalishiamu inahitajika kwa afya ya mifupa na meno pamoja na utendaji wa kawaida wa misuli.

Nusu kikombe cha rhubabi mbichi kina takribani 176 mg za potasiamu na 52 mg za kalishiamu.

Ni mboga yenye nishati kidogo

Rhubabi ina maji mengi na nishati kidogo. Nusu kikombe cha rhubabimbichi kina takribani kilokalori 13, hivyo inaweza kutumika katika mapishi kama sehemu ya mlo wenye nishati ndogo.

Hata hivyo, mara nyingi rhubabihupikwa pamoja na sukari, asali au vitamu vingine kwa sababu ya uchachu wake mkali. Kiasi cha nishati katika chakula cha mwisho kwa hiyo hutegemea kiasi cha kitamu kinachoongezwa.

Viinirishe vinavyopatikana kwenye Rhubabi

• Maji

• Kabohaidreti

• Nyuzi lishe

• Protini

• Vitamini C

• Vitamini A

• Folate

• Potasiamu

• Kalishiamu

• Magnesiamu

• Fosforasi

• Kemikali za mimea

Viinirishe vinavyopatikana kwenye nusu kikombe cha Rhubabi mbichi (gramu 61)

• Nishati = 13 kcal

• Maji = 94%

• Mafuta = 0 g

• Kabohaidreti = 3 g

• Protini = 1 g

• Nyuzi lishe = 1 g

• Kalishiamu = 52 mg

• Chuma = 0 mg

• Zinki = 0 mg

• Manganese = 0 mg

• Potasiamu = 176 mg

• Magnesiamu = 7 mg

• Fosforasi = 9 mg

Vitamini zinazopatikana kwenye nusu kikombe cha Rhubabi

• Vitamini A = 6 RE

• Vitamini C = 5 mg

• Vitamini B1 (thiamin) = 0 mg

• Vitamini B2 (riboflavin) = 0 mg

• Vitamini B3 (niacin) = 0 mg

• Vitamini B6 = 0 mg

• Vitamini B9 (folate) = 4 μg

• Vitamini E = 0 mg

Aina za Rhubabi

Rhubabi hupatikana hasa katika aina mbili kulingana na namna inavyolimwa:

• Rhubabi inayolimwa kwenye nyumba maalumu za mimea (hothouse): huwa na mashina ya waridi au mekundu hafifu na majani ya njano. Kwa kawaida huwa na ladha laini zaidi na mashina yake huwa na nyuzi chache.

• Rhubabi inayolimwa shambani: huwa na mashina mekundu yaliyokolea na majani ya kijani, na kwa kawaida huwa na ladha kali zaidi.

Ndani ya makundi haya kuna spishi na aina nyingi zinazolimwa kwa matumizi mbalimbali.

Rhubabi ilitokea wapi?

Historia ya rhubabiinahusishwa kwa kiasi kikubwa na matumizi yake ya jadi kama mmea wa dawa. Matumizi yake ya kitabibu yalirekodiwa katika maandiko ya kale ya China maelfu ya miaka iliyopita.

Baadaye rhubabi ilienea kuelekea Ulaya na maeneo mengine, na matumizi yake kama chakula yaliongezeka zaidi kuanzia karne ya 18. Kufikia karne ya 19, ilikuwa imekuwa mboga inayojulikana katika baadhi ya masoko ya Ulaya na Amerika Kaskazini.

Rhubabi ni mmea wa kudumu unaopendelea hali ya hewa ya baridi, na hauhimili joto kali vizuri. Mmea huu hutengeneza mizizi mikubwa na mashina manene yanayotumika kama chakula.

Ni sehemu gani ya Rhubabi inayoliwa?

Shina ndiyo sehemu inayoliwa. Majani ya rhubabi hayapaswi kuliwa kwa sababu yana kiasi kikubwa cha oxalic acid na misombo mingine inayoweza kuwa na sumu, hasa yakiliwa kwa kiasi kikubwa.

Kwa hiyo, majani yanapaswa kuondolewa na kutupwa kabla ya kuhifadhi au kupika mashina.

Rhubabi inaweza kuliwa ikiwa mbichi?

Ingawa mashina ya rhubabi yanaweza kuliwa, kwa kawaida hayapendekezwi kuliwa mengi yakiwa mabichi kwa sababu yana uchachu na ukakasi mkali. Mara nyingi hukatwa vipande vidogo, kisha hupikwa kwa kuokwa au kuchemshwa na baadaye kuongezewa kitamu.

Kuchanganya rhubabi na matunda matamu kama stroberi kunaweza kupunguza hitaji la kuongeza sukari nyingi.

Rhubabi huhifadhiwaje?

Kabla ya kuhifadhi, majani yanapaswa kukatwa na kuondolewa. Mashina yanaweza kuwekwa kwenye mfuko wa plastiki na kuhifadhiwa kwenye jokofu, ambako yanaweza kudumu kwa takribani wiki moja.

Rhubabi pia hupatikana ikiwa imegandishwa au kuwekwa kwenye makopo.

Hitimisho

Rhubabi ni mboga yenye nishati kidogo, maji mengi, nyuzi lishe, vitamini C, potasiamu na kalishiamu, na hutumiwa zaidi baada ya kupikwa kwa sababu ya uchachu wake mkali. Mashina pekee ndiyo yanayoliwa; majani yanapaswa kuondolewa na kutupwa kutokana na kuwa na kiwango kikubwa cha oxalic acid na misombo inayoweza kuwa na sumu.