Kinyesi cha kwanza cha mtoto hutoka lini?

Jibu kwa ufupi

Swali la mteja: "Mtoto wangu ana siku 2 tangu azaliwe hajatoa kinyesi, ni kawaida?"

Jibu kwa ufupi: Saa 48 bila kinyesi si kawaida – mpeleke kituo cha afya leo. Akiwa anatapika kijani au tumbo limejaa, nenda hospitali mara moja.

Maelezo

Mabadiliko ya kinyesi ya kawaida

• Siku 1 hadi 2 – mekonium cheusi-kijani, kinachonata.

• Siku 3 hadi 4 – kinyesi cha mpito, kijani-kahawia.

• Siku 5 na kuendelea – kwa anayenyonya maziwa ya mama: njano kama haradali, laini, chenye vitone; soma Kinyesi cha kijani kwa mtoto.

Visababishi vya kuchelewa

• Kunyonya kidogo siku za mwanzo.

• Kizuizi cha mekonium (meconium plug) – mara nyingi kwa njiti.

• Hirschsprung – sehemu ya utumbo haina mishipa ya fahamu.

• Njia ya haja kubwa kutokamilika au kuziba – angalia kama tundu lipo na liko mahali pake.

• Tezi ya shingo kufanya kazi kidogo, maambukizi ya damu.

Nini cha kufanya

• Mnyonyeshe mapema (saa ya kwanza) na mara 8 hadi 12 kwa siku – maziwa ya kwanza (dang'a) husaidia mekonium kutoka; soma Namna nzuri ya kunyonyesha.

• Andika saa ya kinyesi na mkojo wa kwanza na mwambie mtoa huduma.

• Usimpe dawa za kuharisha, maji, mafuta wala dawa za kienyeji.

• Usimwingize kitu kwenye njia ya haja kubwa.

Dalili za hatari

Hospitali mara moja ukiona:

• Kutapika matapishi ya kijani au njano.

• Tumbo kujaa na kuwa gumu – soma Tumbo kujaa gesi.

• Hanyonyi, analegea, homa au mwili baridi – soma Kushindwa kunyonya, homa, mwili kulegea.

• Hakuna tundu la haja kubwa au kinyesi kinatoka mahali pengine.

Lini umwone daktari

• Hajatoa kinyesi kufikia saa 48.

• Hajakojoa kufikia saa 24.

• Baada ya wiki 1, anatoa kinyesi kigumu kwa shida kila mara.

Maswali yanayoulizwa mara kwa mara