Dalili na viashiria vya magonjwa mbalimbali
Unashauriwa kufuata ushauri wa daktari wako kabla ya kuchukua hatua yoyote ile baada ya kusoma makala. Bofya picha au neno soma zaidi ili kuingia kwenye makala kwa undani.
Vipele kwenye uume
Vipele vingi kwenye uume si hatari: vipele lulu (mistari ya vipele vidogo kuzunguka kichwa cha uume), vipele vya Fordyce (vidoa vidogo vya njano) na tezi za Tyson ni maumbile ya kawaida, haviambukizi na havihitaji dawa. Vipele vinavyoambukiza ni sunzua (warts), molaskamu, herpes, skabizi (vipele vinavyowasha usiku) na mpox. Folikulaitisi, fangasi na mzio pia husababisha. Vipele vipya baada ya ngono bila kinga vipimwe.
Kupasuka kwa ngozi ya kichwa cha uume
Kupasuka au kuchubuka kwa ngozi ya kichwa cha uume na govi mara nyingi ni balanitis (uvimbe wa kichwa cha uume) inayosababishwa na fangasi (candida) – hasa kwa wanaume wasiotahiriwa, wenye kisukari au ambao wenzi wao wana fangasi ukeni. Ngozi kavu, sabuni kali, mzio, msuguano wa tendo, psoriasis na herpes pia husababisha. Mipasuko ya govi inayojirudia inaweza kusababisha govi kubana (phimosis). Pima sukari kama inarudi.
Maumivu ya uume wakati wa kujamiiana
Maumivu ya uume wakati wa kujamiiana mara nyingi hutokana na michubuko au mipasuko ya govi na kichwa cha uume (fangasi, ukavu wa mwenzi), govi kubana (phimosis), kamba ya chini ya kichwa kuvutika (frenulum fupi), magonjwa ya zinaa, prostaitisi (maumivu wakati wa kumwaga) na uume kupinda (Peyronie). Maumivu makali ya ghafla pamoja na sauti ya kukatika na uume kuvimba ni kuvunjika kwa uume – dharura.
Maumivu ya pumbu
Maumivu ya pumbu (korodani) ya ghafla na makali, hasa kwa kijana au mtoto, yanaweza kuwa korodani kujisokota (torsion) – dharura inayohitaji upasuaji ndani ya saa 6 ili kuokoa korodani. Maumivu yanayoanza taratibu pamoja na uvimbe, joto na kuungua wakati wa kukojoa mara nyingi ni epididimisi (maambukizi, mara nyingi ya zinaa). Majeraha, ngiri ya kinena, mishipa ya vena kuvimba (varicocele), mawe ya figo na matubwitubwi pia husababisha.
Hisia za joto kwenye ngozi ya mfuko wa korodani
Hisia za joto au kuwaka moto kwenye ngozi ya mfuko wa korodani mara nyingi hutokana na fangasi (kinenani na pumbu), jasho na msuguano, mzio wa sabuni au mafuta, ukurutu na matumizi ya steroid creams kwa muda mrefu. Kwa baadhi ya wanaume hutokea kama sindromu ya ngozi nyekundu ya korodani (red scrotum syndrome). Mara chache ni neva. Vipele, vidonda au usaha pamoja na kuwaka moto vinahitaji uchunguzi wa magonjwa ya zinaa.