Uume kutoa usaha

Kutoa usaha kwenye uume ni dalili mojawapo ya maambukizi ya magonjwa ya zinaa, hasa pale maambukizi yanapokuwa kwenye mrija wa mkojo (yurethra). Tatizo hili huwapata wanaume wengi walio kwenye umri wa kufanya ngono, na mara nyingi huonekana zaidi kwa vijana wadogo.

Kwa kawaida, kutoa usaha huashiria maambukizi ya gonorrhea (kisonono) au chlamydia, lakini kuna vimelea vingine vinavyoweza kusababisha tatizo hili. Makala hii itazungumzia kwa udani kuhusu Uume kutoa usaha visababishi, dalili matibabu na jinsi ya kujikinga.

Dalili za uume kutoa usaha

Kutoa usaha kwenye uume kunaweza kuashiria ugonjwa wa zinaa endapo kitaambatana na dalili zifuatazo:

• Usaha kutoka wenyewe bila kushinikizwa

• Usaha kutoka wakati wa kukojoa

• Maumivu au kuchoma uume wakati wa kukojoa

• Muwasho ndani ya uume wakati wa kukojoa

Visababishi na Vimelea vinavyosababisha

Kutoa usaha hutokea kutokana na maambukizi kwenye mrija wa mkojo (yurethraitis).

Vimelea vinavyosababisha mara nyingi ni:

• Chlamydia trachomatis

• Neisseria gonorrhoeae (ugonjwa wa kisonono)

• Mycoplasma/Trichomonas

Vimelea na viini vingine vinavyoweza pia kusababisha ni:

• Mycoplasma genitalium

• Trichomonas vaginalis

• Kirusi Herpes simplex

• Adenovirus

Ni nani anaweza kupata dalili hii?

Tatizo la uume kutoa usaha linaweza kumpata mwanaume yeyote mwenye historia ya ngono, hususan wale ambao:

• Wana wapenzi wengi

• Hushiriki ngono bila kinga

• Wanaanza ngono wakiwa na umri mdogo

Vipimo vya Uchunguzi

Mara nyingi, daktari anaweza kubashiri ugonjwa kutokana na dalili pekee. Hata hivyo, vipimo vinaweza kuhitajika ili kuthibitisha au kuchagua dawa sahihi, kama vile:

• Kipimo cha mkojo (urine analisis) – huonyesha ongezeko la chembe nyeupe za damu (≥10).

• Kipimo cha Leukosaiti esterase– kipimo chanya huashiria maambukizi.

• Kipimo cha kuotesha kimelea na mwitikio dawa – hufanyika endapo mgonjwa tayari alitumia dawa na hajapona, ili kuchagua dawa inayofaa zaidi.

Matibabu

Matibabu ya kutoa usaha kwenye uume hutegemea aina ya kimelea kilichosababisha tatizo. Mara nyingi, mgonjwa hupewa mchanganyiko wa dawa kwa sababu maambukizi hutokana na zaidi ya kimelea kimoja.

Muhimu: Usitumie dawa bila ushauri wa daktari. Kutumia dawa vibaya kunaweza kusababisha usugu wa vimelea na kushindikana kutibika kirahisi.

Kwa maelezo zaidi, unaweza kusoma makala zetu kuhusu:

• Dawa za gono

• Dawa za kisonono

• Usaha sehemu za siri

• Matibabu kamili ya gono

Jinsi ya kujikinga

Njia bora ya kujikinga na maambukizi haya ni kuepuka ngono hatarishi. Ikiwa huwezi kuacha ngono, zingatia yafuatayo:

• Tumia kondomu kwa usahihi kila unaposhiriki ngono

• Kuwa na mshirika mmoja mwaminifu ambaye hana maambukizi

• Fanya uchunguzi wa afya mara kwa mara endapo una hatari kubwa ya kupata magonjwa ya zinaa

Hitimisho

Kutoa usaha kwenye uume ni dalili kubwa ya maambukizi ya zinaa na huhitaji ushauri wa daktari mapema. Kadiri unavyochelewa kupata matibabu, ndivyo hatari ya madhara makubwa zaidi, kama vile utasa, inavyoongezeka.

Maswali yaliyoulizwa mara kwa mara