Siku za ovulation ni ngapi?

Ovulesheni (ovulation, yai kutoka) hutokea mara moja kwa mzunguko, na yai huishi saa 12 hadi 24. Lakini kwa sababu mbegu za kiume huishi ukeni na kwenye mfuko wa uzazi hadi siku 5, siku za kushika mimba ni takriban 6: siku 5 kabla ya yai kutoka, na siku ya yai kutoka. Yai hutoka takriban siku 14 kabla ya hedhi inayofuata, kwa hiyo kwa mzunguko wa siku 28 ni karibu siku ya 14, na kwa siku 32 ni karibu siku ya 18.

Kokotoa kwa kutoa 14 kutoka urefu wa mzunguko wako. Kwa mfano, mzunguko wa siku 30 kutoa 14 ni siku ya 16. Siku zenye nafasi kubwa zaidi ya mimba ni siku 2 kabla ya yai kutoka na siku yenyewe.

Ovulesheni ni nini?

Ovulesheni ni kitendo cha yai kutoka kwenye ovari na kuanza safari kwenye mrija wa uzazi. Mbegu za kiume zikiwepo, au zikiingia wakati huu, yai linaweza kurutubishwa, na mimba huanza. Yai lisiporutubishwa hufa, na hedhi hufuata karibu siku 14 baadaye.

Siku ya kwanza ya mzunguko ni siku ya kwanza ya hedhi. Urefu wa mzunguko ni idadi ya siku kutoka hedhi moja hadi hedhi inayofuata. Soma Siku ya kupata mimba (ovulesheni).

Siku ya ovulesheni kwa kila mzunguko

Jedwali hili linatumia hesabu ya siku 14 kabla ya hedhi inayofuata. Ni makadirio: siku halisi inaweza kusogea siku chache.

Unaweza kutumia Kikokotoo cha siku za hatari. Maelezo zaidi yako kwenye Kukokotoa siku ya uovuleshaji.

Yai na mbegu huishi kwa muda gani?

• Ovulesheni yenyewe: ni tukio la muda mfupi ndani ya siku moja.

• Yai: huishi saa 12 hadi 24 baada ya kutoka.

• Mbegu za kiume: zinaweza kuishi hadi siku 5 kwenye ute mzuri wa shingo ya kizazi.

Kwa sababu hiyo, tendo la siku 3 kabla ya yai kutoka linaweza kuleta mimba siku yai linapotoka. Baada ya yai kufa, nafasi ya mimba hupungua sana hadi mzunguko unaofuata.

Jinsi ya kutambua siku ya ovulesheni

• Hesabu mzunguko wako: andika siku ya kwanza ya hedhi kwa miezi 3 hadi 6, ili kupata wastani.

• Chunguza ute: ute unaoteleza na kuvutika ni ishara ya siku za kushika mimba.

• Pima joto la mwili asubuhi: joto hupanda kidogo, karibu 0.3 hadi 0.5°C, baada ya yai kutoka. Kwa hiyo linathibitisha yai limetoka, lakini halitabiri mapema.

• Sikiliza mwili: baadhi hupata maumivu madogo upande mmoja wa tumbo la chini, au matiti kuuma kidogo.

• Tumia kipimo cha LH: hupatikana kwenye baadhi ya maduka ya dawa, na huonyesha chanya saa 24 hadi 36 kabla ya yai kutoka.

Dalili nyingine zimeelezwa kwenye Dalili za siku za hatari kwa mwanamke.

Kwa nini hesabu inaweza kukosea

Tafiti zimeonyesha siku ya ovulesheni hubadilika kati ya mwanamke na mwanamke, na hata kwa mwanamke mmoja kati ya mwezi na mwezi. Msongo wa mawazo, ugonjwa, safari, mabadiliko ya uzito, kunyonyesha, na kuacha njia za uzazi wa mpango vinaweza kuisogeza. Kwa mzunguko usio wa mpangilio, kalenda pekee haiaminiki, kwa hiyo tumia ute na vipimo vya LH.

Unatafuta mimba

• Jamiianeni kila siku 2 hadi 3 katika mzunguko mzima, au angalau kila siku 2 siku za kushika mimba.

• Usisubiri siku moja tu, kwa sababu inaweza kukosewa.

• Anza kutumia folic acid kabla ya mimba, kwa ushauri wa mtoa huduma.

• Soma Nawezaje kutungisha mimba haraka?.

Unazuia mimba

Kutegemea kalenda pekee hushindwa mara nyingi. Tumia njia imara ya uzazi wa mpango, au kondomu kila tendo. Soma Siku za hatari kwa mwanamke na Njia ya kalenda.

Dalili za hatari

• Maumivu makali ya ghafla upande mmoja wa tumbo, pamoja na kizunguzungu. Inaweza kuwa mimba kutunga nje ya kizazi au uvimbe wa ovari kupasuka. Nenda hospitali mara moja.

• Maumivu ya tumbo pamoja na homa au uchafu wenye harufu mbaya ukeni.

Lini umwone daktari

• Mmejaribu mimba kwa mwaka 1, au miezi 6 kama una miaka 35 au zaidi, bila mafanikio. Soma Ugumba.

• Mzunguko wako mara kwa mara ni chini ya siku 21, au zaidi ya siku 35.

• Hedhi imechelewa. Soma Hedhi kuchelewa.

• Una dalili za PCOS, kama chunusi nyingi, nywele usoni na hedhi kupotea. Soma PCOS.

Maswali yanayoulizwa mara kwa mara